ಮಾಲೆ ಪಟಾಕಿ

ಮಾಲೆ ಪಟಾಕಿದ ಬಗ್ಗೆ....

ಮದಿಪು ನಟ್ಟೊಂದು ರಡ್ಡ್ ಪಾತೆರ



ಕೆಲವು ವರ್ಸೊಡ್ದು ದುಂಬು, ಒಂಜಿ ದಿನ ಪಕ್ಕಂದ್, ಈ ನಾಡ್‍ದ ಹಿರಿಯ ಸಾಹಿತಿ ಬೊಕ್ಕ ಜಾನಪದ ವಿದ್ವಾಂಸೆರಾಯಿನ ಪ್ರೊ. ಅಮೃತ ಸೋಮೇಶ್ವರೆರ್ ಬರೆತಿನ ಪೊ ಸ ಗಾದೆಲು ಪನ್ಪಿನ ಪುಸ್ತಕದ ಪರತ್ ಪ್ರತಿ ಒಂಜಿ ತಿಕ್ಕ್‍ಂಡ್. ಅವೆನ್ ಓದೊಂದು ಪೋಯಿಲೆಕ್ಕನೆ ಪೊಸ ಮೆಂಚಿ ಎನ್ನ ಮನಸ್‍ದುಲಯಿ ಮೆನ್ಕ್‍ಂಡ್.

ಗಾದೆ ದುಂಬುದಕುಲ್ನನೇ ಆವೊಡುಂದಿಜ್ಜಿ. ನಮ ನಮ್ಮ ಬದ್‍ಕ್‍ಡ್ ನಿತ್ಯ ನಡಪುನ ಸಂಗತಿಲು, ಪಡೆಪಿನ ಅನುಭವ, ಪಾತೆರಕತೆತ ನಡುಟು ಉಂಡಾಪಿನ ಪರ್ತೆದ ನುಡಿಗಟ್ಟ್‍ಲಾ ಗಾದೆಲಾದ್ ರೂಪ ಪಡೆಪಿನ ಸತ್ಯ ತೆರಿಂಡ್. ಆನಿಡ್ದ್ ಅಪಗಪಗ ಎಂಕ್ ತೋಜಿನವು, ಮನಸ್‍ಗ್ ಬತ್ತಿನವೆನ್ ನೆಂಪುಡು ದೀವೊಂದು ಅಲ್ಪಲ್ಪ ಬರೆದೀವೊಂದು ಕೂಡ್ದು ಪಾಡ್ದ್, ಎನ್ನ ಹಿರಿಯ ಮಿತ್ರೆ, ಸಾಹಿತಿ ಶ್ರೀ ಭಾಸ್ಕರ್ ನೆಲ್ಲಿತೀರ್ಥೆರೆಡ ಅವೆನ್ ಓದುದು ಪಂಡೊಂದು ತಿದ್ದ್‍ದ್ ದೀವೊಂದಿತ್ತೆ.

ಇಂಚಿಪ್ಪ ಅವೆನ್ ನಮ್ಮ ನಾಡ್‍ದ ಹಿರಿಯ ಜಾನಪದ ವಿದ್ವಾಂಸೆರಾಯಿನ ಡಾ. ವಾಮನ ನಂದಾವರ ಮೆರೆಡ ಕೊರ್ದು ಮುನ್ನುಡಿ ಬರೆದ್ ಕೊರ್ಲೇಂದ್ ಕೇಂಡೊಂಡೆ. 
ಆರ್ ಪ್ರತಿ ಒಂಜಿ ಗಾದೆನ್‍ಲಾ ಬೇತೆ ಬೇತೆ ದೃಷ್ಟಿಕೋನಡ್ ತೂದ್, ತಿದ್ದುನಲ್ಪ ತಿದ್ದ್‍ದ್ ಪೊಸ ದೇಕಿ ಕೊರಿಯೆರ್ ಮಾತ್ರ ಅತ್ತ್ ಎನ್ನ ಬೆರಿ ಬೊಟ್ಟುದು ಮೋಕೆಡ್ ಪೊರ್ಲುದ ಮುನ್ನುಡಿ ಬರೆದ್ ಕೊರ್ತೆರ್. ಆರೆಗ್‍ಲಾ ಶ್ರೀಮತಿ ಚಂದ್ರಕಲಾ ನಂದಾವರ ಮೆರೆಗ್‍ಲಾ ಎನ್ನ ಉಡಲ್‍ಡ್ದ್ ಸೊಲ್ಮೆ ಸಂದಾವೆ.

ಈ ಗಾದೆಲೆಗ್ ಚಿತ್ರದ ಮೂಲಕ ನನಲಾತ್ ಪೊರ್ಲು ಕನತಿನ ಎನ್ನ ಹೈಸ್ಕೂಲ್ದ ಮಾಸ್ಟ್ರ್ ಶ್ರೀ ಜಯಂತ ಶೆಟ್ಟಿ ಉಜಿರೆ ಇಂಬೆರೆಗ್ ಎನ್ನ ಮೋಕೆದ ಸೊಲ್ಮೆಲು.
ಎನ್ನ ಸಾಹಿತ್ಯದ ಬುಳೆಚಿಲ್‍ಗ್ ಏಪಲಾ ಕೈಯೇರ್ದ್ ಆಶೀರ್ವಾದ ಮಲ್ಪುನ ಎನ್ನ ಅಮ್ಮೆರ್ ಶ್ರೀ ರತ್ನಾಕರ ರಾವ್ ಕಾವೂರು, ಅಮ್ಮ ಶ್ರೀಮತಿ ಜಯಂತಿ ರಾವ್ ಕೆ., ಎನ್ನ ಕೈಪತ್ತಿನ ಮಯೂರಿ, ಮೋಕೆದ ಮಗಲ್ ಶರಧಿ, ಎನ್ನ ಕುಟುಮದಕುಲು ಬೊಕ್ಕ ಎನ್ನ ಮಾತ ದೋಸ್ತಿನಕ್‍ಲೆನ್ಲಾ ಅರ್ತಿಡ್ ನೆನೆಪುವೆ.

 ಪೊರ್ಲಕಂಟ್‍ದ ಅಚ್ಚಿಗ್ ಪುದರಾಯಿನ ಆಕೃತಿ ಪ್ರಿಂಟ್ಸ್‍ದ ಶ್ರೀ ಕಲ್ಲೂರು ನಾಗೇಶೆರೆಗ್, ಬೂಕುಗೊಂಜಿ ಪೊರ್ಲುದ ತುತೈತ ಪಾಡ್ನೆಕ್, ಬೊಕ್ಕ ಮಾತ ಸಿಬ್ಬಂದಿ ವರ್ಗೊಗು ಈ ಬೂಕುನುಲಾ ಪೊರ್ಲುಡೇ ಅಚ್ಚಿದಿಲ್ಲಡೆ ಕಡಪುಡುದು ಪೊ ರ್ಲು ಮಲ್ತಿನೆಕ್ಕ್ ಎನ್ನ ಸೊಲ್ಮೆ ಸಂದುಂಡು.
ಈ ಬೂಕುದ ಪ್ರಕಟಣೆದ ಜವಾಬ್ದಾರಿನ್ ದೆತೊನುನ ಒಟ್ಟಿಗೆ ಎನ್ನ ಸಾಹಿತ್ಯದ ಬೇಲೆಗ್ ಶಬಾಸ್‍ಗಿರಿ ಕೊರೊಂದುಪ್ಪುನ ರಂಗಸಂಗಾತಿ (ರಿ.) ಬಳಗದ ಮಾತಾ ಆಪ್ತೆರ್‍ನಕ್‍ಲೆಗ್ ಎನ್ನ ಉಡಲ್‍ದ ಸೊಲ್ಮೆ.
ಈ ಬೂಕು ಬುಡುಗಡೆತ ಲೇಸ್‍ಡ್ ಪಾಲ್ ದೆತೊಂದು ಎಡ್ಡೆಪ್ಪುದ ಮದಿಪು ಕೊರ್ನ ಎನ್ನ ಆತ್ಮೀಯೆರಾಯಿನ ಡಾ. ಬಿ.ಎ. ವಿವೇಕ ರೈ, ಡಾ. ಎಂ. ಮೋಹನ ಆಳ್ವೆರ್, ಡಾ. ನಾ. ಮೊಗಸಾಲೆ, ಡಾ. ವಾಮನ ನಂದಾವರ, ಲ| ಕಿಶೋರ್ ಡಿ. ಶೆಟ್ಟಿ,  ಶ್ರೀ ರತ್ನಾಕರ ರಾವ್ ಕಾವೂರು, ಶ್ರೀ ಗೋಪಾಲ್ ಶೆಟ್ಟಿ ಮೊಕುಲೆಗ್‍ಲಾ ಎನ್ನ ತರೆ ತಗ್ಗಾವೊಂದು ಬೂಕು ಓದುನ ತುಳು ಬಂದುಲೆಗ್‍ಲಾ ಸೊಲ್ಮೆ ಸಂದಾವೊಂದುಲ್ಲೆ.

ಶಶಿರಾಜ್ ರಾವ್ ಕಾವೂರು

ಮುನ್ನುಡಿ - ಡಾ.ವಾಮನ ನಂದಾವರ

ಶಶಿರಾಜ್ ರಾವ್ ಕಾವೂರ್ ರೆನ ಈತ್ ಮಾತಾ ಗಾದೆಲೆನ್ಲ್  ಯಾನ್ ಬೊಕ್ಕಲ ಬೊಕ್ಕಲಾ ಓದುದು ಆ ರಾಶಿಡ್ದ್ ಒಂಜಾತ್ ಪೆಜ್ಜಿದ್ ಎನ ಗೇನೊದ ಜೊಳಿಗೆಡ್ ದಿಂಜಾವೋಂದು ಸಬಿತೋಂದುಲ್ಲೆ.ಅವೆನ್ ಮಾತಾ ಒಟ್ಟು ಒರ ಜಮಿತ್, ಗುಣಿತ್ ತೂಂಡ ನಾಲೈನ್ ರಾಶಿಲೆನ ಒಟ್ಟು ಬೆರಾದ್ ಪರಡಾದ್ ದೀತಿಲೆಕೋ ತೋಜುವೊ.

ಎಂಚಿನಾಂಡಲಾ ಗಾದೆ ಉಡಲ್ ಗ ನಾಟುನೆ ಅಯುಟುಪ್ಪಿ ಪ್ರಾಸ ಅಚ್ಚರೊದ ಅತ್ತಂಡ ಪ್ರಾಸ ನುಡಿತ್ತ ಜೋಡುನೆಡ್ದ ಅಂಚಿತ್ತಿ ಗಾದೆಲು ಶಶಿರಾಜೆರೆನ ಕಡ್ಡಿಲ್ದ್ ಕೊಡಪುದ ಪೊಸ ಕೊಡಿಪುಲು ಪುಡತ್ತದ್ ಒರ್ಮೆಲ್ ಕಿಟಿ ರಟ್ಟುನ ಮಾಲೆ ಪಟಾಕಿಲು.

ಬೆರ್ಚಪ್ಪಡ ಚರ್ಚೆ ಪಾತೆರ್ಯೆರೆ ಕುಲ್ಲಿಲೆಕ್ಕೊ...ಇಂಚಿತ್ತಿ ಗಾದೆಲೆನ್ ತನ ಉಡಲ ಕರ್ಜನೊಡ್ದು ಪಿದಾಡ್ಪಾವುನವೇ ಅರೆನ ಸ್ರಜನಶೀಲ ಶಕ್ತಿದ ಪ್ರದಾನ ಅಂಶ..
- ಡಾ.ವಾಮನ ನಂದಾವರ

ಮಾಲೆ ಪಟಾಕಿ ತುಳು ಗಾದೆಲು - ಅ - ಆ - ಇ

ಅ

1. ಅವುಸ ದಂಗ್‍ನಗ ಆಸೆ ಎಚ್ಚಾಂಡ್‍ಗೆ
2. ಅಟ್ಟೆ ಕಾರ್‍ದಾಯೆ ಚೊಟ್ಟ ಪಿಲಿಕ್ ಮಕ್ಕರ್ ಮಲ್ತಿಲೆಕ್ಕ
3. ಅರ್ಗಂಟ್  ಕಂಡನಿಗ್ ಅರ್ಬುದ ಬುಡೆದಿ
4. ಅಕಲ್‍ದಾಂತಿನಾಯಗ್ ವಕಾಲತ್‍ದ ಬೇಲೆ ದಾಯೆ?
5. ಅಂಗ್‍ದ್‍ನಪಗ ಅಸರ್ ಕೊರಂದೆ, ಸೈತಿಬೊಕ್ಕ ಸರಬತ್ ಪರ್ಪಾದೆಗೆ
6. ಅರ್ದ ಕ್ರಯೊಗು ತಿಕ್ಕ್‍ಂಡ್‍ಂದ್ ವರ್ದದ ಆಣಿ ದೆತೊಂಡೆಗೆ
7. ಅಮ್ಮೆರ್ ಅಮೇರಿಕೊಡು ಸೈತೆರ್‍ಡ, ಊರುಡು ಉಲಾಯಿ ಲೆಪ್ಪೆರೆ ಆಪುಂಡಾ?
8. ಅಂಗಾರೆ ಊರುಡುಲ್ಲನಾಂದ್ ಕೇಂಡ ಅಂಗರಗುಂಡಿಗ್ ಯಾನ್                         ಬರ್ಪುಜೀಂದ್ ಪಂಡೆಗೆ
9. ಅಪೂರ್ಪೊಗು ಬರ್ಪಿನಾಯಗ್‍ಲ, ಏಪಲ ಬರ್ಪಿನಾಯಗ್‍ಲ ಉಪಚಾರ                 ಒಂಜೇಲೆಕ್ಕ ಉಪ್ಪಂದ್
10. ಅಣಸ್‍ದಾಂತಿನ ಮಾವುತನ್ ಆನೆ ಒಯ್ತ್ ದಕ್ಕೆಂಡ್‍ಗೆ

11. ಅಮ್ಮೇನೇ ಅರ್ಬುದಾಯೆ, ಮಗೆ ಎಂಚಲ ಅರಂಚೆಲೆ
12. ಅಲ್ವೆಲುನ ಮಿತ್ತ ಕೊಂಬಚೇಲ್ ಬೂರಿಲೆಕ್ಕಾಂಡ್
13. ಅಪಗಪಗ ಬರ್ಪಿನ ಬಿನ್ನಗ್ ತಡ್ಪೆಡ್ ಅರಿ ದೀಯರ್‍ಗೆ
14. ಅಂಗಾರೆ ಮದ್ಮೇಂದ್ ಐತಾರನೇ ಐತ ಆದ್ ಕುಲ್ದಲ್‍ಗೆ
15. ಅಂಬರಮರ್ಲನ್ ಅಂಗಡಿಡ್ ಕುಲ್ಲಾದ್ ಬೇರಕಮ್ಮಿ ಪಂಡೆಗೆ 
16. ಅಪುರ್ಪೊಗು ಬಂಜರ ವನಸ್ ತಿಕ್ಕ್‍ಂಡ್ ಬಂಜಿ ಬಿರಿಯಿಲೆಕ್ಕ ತಿಂದ್‍ದ್               ಕಕ್ಕಿಯೆಗೆ
17. ಅಕ್ಕಸೊಗು ಲೆಂಚಿ ದೀಪೆ ಪಂಡಿನಾಯಡ ಬೊಕ್ಕ ಎಂಚಿನ ಪಾತೆರುನು?
18. ಅರಿಬಾರ್ ಇತ್ತ್‍ಂಡನೇ ಕಾರ್‍ಬಾರ್ 
19. ಅರೆಗಾಲ ಆಂಡ ದಾನೆ  ಕರೆಗಳ ಉಂತುವಾ
20. ಅರ್ಬುದಾಯಗ್ ಚರ್ಬಿ ಎಚ್ಚಗೆ
21. ಅಂಕುಸ ಇತ್ತ್‍ಂಡ ಆನೆ, ಆಸೆಡಿತ್ತ್‍ಂಡನೆ ಪೊಣ್ಣು
22. ಅರಿ ಒಂಜಿ ಪುಂಡಿ ಪಾಡ್‍ಂಡಲ ನುಪ್ಪು ಒಂಜಿ ಪುಂಡಿಡ್ ಪತ್ತುವಾ?
23. ಅಂಗಲಪ್ಪುಡು ಪಾರ್ ಬತ್ತಿನ ಪೆತ್ತೊಗು ಅಂಗದಾಂತಿನ ಬೋರಿ ತಿಕ್ಕೊಡಾ?
24. ಅಮ್ಮೇರೇ ಅಂಗಿ ಇಜ್ಜಂದೆ ತಿರ್ಗೊಂದುಲ್ಲೆರ್, ಜೊಕುಲ ಜಾಕಿ ಚಡ್ಡಿ                       ಬೋಡುಂದು ಪಂಡಗೆ

ಆ
1. ಆಜ್ಞೆ ಸುಗ್ರೀವನ ಆಂಡಲಾ ರಾವಣನ ಸೈನಿಕೆರೆಗ್ ಲಗಾವು ಉಂಡಾ?
2. ಆಡಳ್ತೆದ ಕುರ್ಸುಡು ಅಂಡೆದುರ್ಸುನು ಕುಲ್ಲಾಯಿಲೆಕ್ಕ

3. ಆಸ್ತಿದ ವಿಷಯ ಬನ್ನಗ ದೋಸ್ತಿಕತೆಲ ಮರತ್ ಪೋವು
4. ಆನೆಗ್ ಅಗಿಯುನ ಕೂಲಿ ಬೇತೆನೆ, ಕಂತಾಯರೆ ಬೇತೆನೆ.

ಇ
1. ಇಲ್ಲದಕ್ಲೆನ ಮುಲಾಜಿಗ್ ಕಾಲೆಜಿಗ್ ಪೋದು, ಸಮಕಟ್ಟ ಕಲ್ಪಾವುಜೆರ್‍ದ್ ದೂರ್‍ದೇ
2. ಇಲ್ಲ ಮಲ್ಲಾಯನಾವಡ್, ಪಾಪದಾಯನ ಆವಡ್, ತೂ ಬೂರ್‍ಂಡ ಬೊಣ್ಯನೆ
3. ಇತ್ತಿನೆನ್ ಇತ್ತಿಲೆಕ ಪಂಡಿನೆಕ್ಕ್ ಕತ್ತಿ ಪತ್‍ದ್ ಬೆರಿಪತ್‍ದೆರ್‍ಗೆ
4. ಇರೆ ಪಾಡ್ನಗ ಪೂರ ಇತ್ತೆರ್, ಮಡೆ ದೆಪಪ್ರೆ ಆನಗ ಏರ್ಲ ಇಜ್ಜೆರೆ
5. ಇಲ್ಲಡ್ದ್ ಪಿದಡನಗ ಪೋಪೆ ಪನಿಯರೆ ಬಲ್ಲಿ, ಮಸಣಡ್ದ್ ಬನ್ನಗ ಬರ್ಪೆಂದ್                ಪನಿಯರೆ ಬಲ್ಲಿ.

ಮಾಲೆ ಪಟಾಕಿ ತುಳು ಗಾದೆಲು - ಈ - ಎ/ಏ

ಈ
1. ಈಡ್ ಕಟ್‍ದ್ ದೀಡಲ ಕೇಡ್ ದಾನೆ ಪೋಯಿಜೀಂದ್ ಕೇಂಡೆರ್‍ಗೆ

 ಎ/ಏ
1. ಎಣ್ಣೆ ಪೂಜಿನ ಕೈಕ್ ಮಯಣ ಪತ್ತಂದ್, ಕಣ್ಣೋಜಿನಕ್ಲೆನ ತಪ್ಪು ಪಿದಯಿ                 ಬರಂದ್
2. ಎಲ್ಲ ಗಾಲಿಗ್ ಇರೆ ಪಂದ್‍ಂಡ್, ಮಲ್ಲ ಗಾಲಿಗ್ ಮರ ಬೂರು.
3. ಎಲಿ ತೂಂಡ ಚಲಿ ಜ್ವರ ಬರ್ಪಿನಾಯಗ್, ಪಿಲಿ ತೊಜಾಯಿಲೆಕ್ಕಾಂಡ್
4. ಎಡ್ಡೆಂತಿನಾಯಗ್ ಸುರುಕು ಬಂಜಿ, ಕಲ್ವಗ್ ಕಡೇಕ್ ಬಂಗ.
5. ಎಲಿಕ್ ದೀನ ಮರ್ದ್‍ನ್ ಪುಚ್ಚೆ ತಿಂದ್‍ದ್ ಸೈತಿಲೆಕ್ಕಾಂಡ್
6. ಎದುರು ಪೋಯಿನ ಗಿಡೆರುನಾಯನ್ ಎರು ಬೆರಿಪತ್ತಿಲೆಕ್ಕ
7. ಏಯಿ ಪಂಜಿನ್ ಕೈಟ್ ದೇರ್‍ದ್, ಕಾಲಿ ಮೈಟ್ ಉಂತಿಲೆಕ್ಕ
8. ಎಲ್ಲ ಗಾಲ ಪಾಡ್ದ್ ಕಡಲ ಪಂಜಿ ತಿಕ್ಕೊಡು ಪಂಡ ಎಂಚ.
9. ಎಣ್ಣೆ ಪೂಜಿನ ಕೈಕ್ ಮಯಣ ಪತ್ತಂದ್, ಪೊಣ್ಣ ಮರ್ಲಗ್ ವೊವುಲ ಪತ್ತಂದ್ 
10. ಏತ್ ಕೊರ್‍ಂಡಲ ಈತೆನಾಂದ್ ಕೇನುನಾಯಗ್ ಮಾತ ಕೊರ್‍ಂಡ್‍ಲ                   ಪ್ರಯೋಜನ ಇಜ್ಜಿ
11. ಏತ್ ಸೆಕ್ಕರೆ ತಿಂದ್‍ಂಡಲ ಪಿಜಿನ್‍ಗ್ ಡಯಾಬಿಟಿಸ್ ಬರುವಾ?
12. ಏಲಮ್‍ಗ್ ಪೋದು ಸಾಲ ತಿಕ್ಕುವಾಂದ್ ಕೇಂಡಿಲೆಕ್ಕ
13. ಎಲಿಕ್ ಪೋಡುವ ಪುಚ್ಚೆಲ ಒಂಜೆ, ಕಲ್ವಗ್ ಕೊರೆಪಂದಿ ನಾಯಿಲ ಒಂಜೆ
14. ಏಟಿಯಮ್‍ಗ್ ಕಾಸ್ ದೆಪ್ಪರೆ ಪೋದು, ಏರ್ಲ ಇಜ್ಜೆರ್‍ಂದ್ ಪಿರಬತ್ತೆಗೆ
15. ಎಡ್ವರ್‍ಟೈಸ್‍ಮೆಂಟ್‍ಡ್ ತೋಜಾಯಿನ ಮಾತಾ ಎಡ್ಡೆನಾ? 
16. ಅಜತ್‍ದ್ ಪಾಡಿನೆಟ್ ಹಳ್ ಉಪ್ಪಂದ್
17. ಎಲಿತ ಉಪದ್ರ ಉಂಡುಂದು ಕೇರೆ ಸಾಂಕಿಲೆಕ್ಕ

ಮಾಲೆ ಪಟಾಕಿ ತುಳು ಗಾದೆಲು - ಉ - ಊ - ಒ/ಓ

ಉ
1. ಉರ್ಕಿನ ಪೇರ್ ದಿಕ್ಕೆಲ್‍ಗ್ ಸೊರ್ಕಿನ ನರಮಾನಿ ಗುಂಡಿಗ್
2. ಇಗುರು ಉಪ್ಪುನಾಡೆ ಮುಟ ಬಿರೆಲ್‍ಗ್ ತೊಂದರೆ ಇಜ್ಜಿ
3. ಉಳ್ಳಾಯಡ್ದ್‍ಮ ಮಲ್ಲಾಯೆ ಒರಿ ಉಲ್ಲೆಗೆ
4. ಉಪ್ಪು ತಿನಿಯರೆ ಉಂಡುಂದು ಕುಪ್ಪಿಡ್ ನೀರ್ ದೆತ್ತೆದೀಯೆಗೆ
5. ಉಪ್ಪು ನೀರ್‍ದ್ ಕಡಲ್‍ಗ್ ಪೋನಗ ಕುಪ್ಪಿಡ್ ನೀರ್ ಕೊನೊಂಡ ಎಡ್ಡೆ
6. ಉರಲ್‍ದಾಂತಿ ಬೆನ್ನಿ, ಪುರಲ್‍ದಾಂತಿ ಕೃಷ್ಣೆ
7. ಉಮಿಲ್‍ದ ಉಪದ್ರ ಪಂಡ್‍ದ್ ಊರು ಬುಡಿಯರೆ ಆಪುಂಡಾ?
8. ಉಚ್ಚು ಪತ್ತುನಾಯೆ ಮುಂಗುಲಿ ತುಚ್ಚಿದ್ ಸೈತೆಗೆ
9. ಉಲಯಿ ಇತ್ತ್‍ಂಡ ಉಬಿನೀರ್, ಪಿದಯಿ ಬತ್ತ್‍ಂಡ ಮಡೆನೀರ್
10. ಉಡುಪಿ ಹೊಟೇಲ್ ಪಾಡ್ರೆ ಕಡೆಪಿ ಕಲ್ಲ್ ಒಂಜಿ ಇತ್ತ್‍ಂಡ ಯಾವಾ?
11. ಉಂತುದಿನ ವಾಚ್ ಪಾಡೊಂದಿನಾಯಿಡನೇ ಗಂಟೇತಾಂಡ್‍ಂದ್                         ಕೇಂಡಿಲೆಕ್ಕಾಂಡ್
12. ಉಂಡಿನ ಇರೆಟ್ ಉಪ್ಪು ಒರಿಪಾಯೆರೆ ಬಲ್ಲಿ, ದಂಡ್‍ದ ಕಳೊಡ್ದು ತಪ್ಪಾದ್             ಪೋಯರೆ ಬಲ್ಲಿ

ಊ
1. ಊರುಡು ಮಲ್ಲ ಜನ ಬಾರ್‍ಡ್ ಮಲ್ಲ ಕುಡಿ

ಒ/ಓ
1. ಒಂಜಿ ಕೈ ತಾಯನ್ ಮದ್ದಲೆ ಬೊಟ್ಟೆರೆ ಲೆತ್ತೆರ್‍ಗೆ
2. ಒಂಜಿ ಗಾಲ ಪಾಡ್ದ್, ಪುಂಡೆ ಮೀನ್ ತಿಕ್ಕೊಡೂಂದು ಪಂಡ ಎಂಚ?
3. ಒರಿ ತೂ ಕೊರ್ಪಿನಾಯ, ಬೊಕ್ಕೊರಿ ಗಾಲಿ ಉರ್ಪುನಾಯೆ/ಪಾಡುನಾಯೆ
4. ಒಟ್ಟೆ ಕುತ್ತರಿಡ್ ಚೊಟ್ಟೆ ಕೋರಿ
5. ಒಂಜಿ ಕೈಟ್ ಬೊಟ್ಟುನಿ, ಬೊಕ್ಕೊಂಜೆಟ್ ತಟ್ಟುನಿ
6. ಒಕ್ಕೆಲಾಪಿನ ಪೊರ್ತುಗೇ ಓಡು ಒಟ್ಟೆ ಆದ್ ತೋರೋಡಾ?
7. ಒಡು ಪತಿನಾಯಗ್ ಬಡುತ ಪೆಟ್ಟ್‍ಲ ಮಡುತ ಪೆಟ್ಟ್‍ದ ಲೆಕ್ಕ ಆವುಗೆ?
8. ಒಕ್ಕೆಲ್ ಲಕ್ಕೆರೆ ಪಂಡಿಬೊಕ್ಕ ದಿಕ್ಕೆಲ್‍ಡ್ ಪೇರ್ ಉರ್ಕಾರಾವುನು ದಾಯೆ?
9. ಓಡೆಗ್ ಪೋಂಡಲ ಪರ್ಕಟ್ ಬಾಯಿದಾಯಗ್ ಬರ್ಕತ್ ಇಜ್ಜಿ

10. ಓಡು ಒಟ್ಟೆ ಆಂಡ ಬದುಕೊಲಿ, ಓಡ ಒಟ್ಟೆ ಆಂಡ ದಾನುನಿ                                   (ಬದುಕೊಲಿಯಾ)?
11. ಒಲ್ಲೆ ತುಚ್ಚಿಂಡ ಮಲ್ಲೆಜ್ಜೀಂದ್ ಬುಡೊಲಿ, ಮರಿ ತುಚ್ಚಿಂಡ ಬುಡೊಲಿಯಾ?

ಮಾಲೆ ಪಟಾಕಿ ತುಳು ಗಾದೆಲು - ಕ

ಕ
1. ಕೋರಿದ ಕಿನ್ನಿ ಕುದ್ಕನ ಇಲ್ಲಗ್ ಕಂಡೆರೆ ಪೋಯಿಲೆಕ್ಕ
2. ಕಂರ್ಬು ಜೂಸ್‍ದ ಅಂಗಡಿಡ್ ಕೆಲೆಂಜಿಗ್ ಬೇಲೆ ದಾದಾಂದ್ ಕೇಂಡಿಲೆಕ್ಕಾಂಡ್
3. ಕುಡಿ ಆಂಡಲಾ ಭಾರಿ ಮಡಿತಾಯೆ
4. ಕಲಿ ಪರ್ಪರಾಂದ್ ಕೇಂಡಿನೆಕ್ಕ್ ಚಾಕನ್‍ಗ್ ಕೊರಂಟ್ ಕೊರ್ಪರಾಂದ್                 ಕೇಂದೆಗೆ
5. ಕಪ್ಪುದ ಕನ್ನಡಕ ದೀವೊಂದು ಮುಗಲಾಂಡ್‍ಂದ್ ಪಂಡೆಗೆ
6. ಕುಪುಳ್ ಕಣ್ಣ್‍ದಾಯನ್‍ಲ ಕುಡಿಂದ್ ಲೆತ್ತಿಲೆಕ್ಕ
7. ಕಂಡ ದಪ್ಪರೆ ಆವಂದಿನ ಎರು, ಕಂಡಣಿನೊಟ್ಟೆಗೆ ಉಪ್ಪರೆ ಆವಂದಿನ ಬುಡೆದಿ
8. ಕಂಡರೆ ಬರ್ಪಿನಾಯೆ ಪಂಡ್‍ದ್ ಬರ್ಪೆನಾ?

9. ಕಣ್ಣ್ ತೋಜಂದಿನಾಯಗ್ ಕಣ್ಣಡಕ ದಾಯೆ?
10. ಕುದುರೆಗ್ ಕಾಸ್ ಕೊರ್ದು ಕುಡುಕು ಕುಡುಕು ಆಸೆ ಮಲ್ತೆಲೆಕ್ಕಾಂಡ್
11. ಕುಟ್ಟುಂಡ ತಾಲುನೆಕ್ಕ್ ಕೊಕ್ಕೆ ದಾಯೆ?
12. ಕೆಬಿ ಕೇನಂದಿನಾಯಗ್ ಮೊಬೈಲ್ ದಾಯೆ?
13. ಕಲ್ತ್‍ದ್ ಪಾಸ್ ಆಯಿನಾಯೆ ಕಂಡಡುಲ್ಲೆಗೆ, ಕಾಪಿ ಮಲ್ತ್‍ದ್ ಪಾಸ್                 ಆಯಿನಾಯೆ ಮಂಡಡುಲ್ಲೆಗೆ
14. ಕಂಜಿನ್ ಪೂಜಿಲೆಕ ದೇಜಿನ್ ಪೂಜಿದೆಗೆ
15. ಕೋರಿದ ಕಟ್ಟೊಗು ಕುದುಕನ ಗುರ್ಕಾರ್ಮೆಗೆ
16. ಕಂಟೆಲ್‍ದ ಪಕಳ ಸರ ಸೋಕಿಜ್ಜಿ ಪಂದ್ ಸೊಂಟದ ನೂಲು ಪಂತ್‍ಂಡ್‍ಗೆ
17. ಕಕ್ಕೆಡ ಕೇಂಡ್‍ದ್ ಪಿಂಡ ಬುಡಿಲೆಕ್ಕ
18. ಕಕ್ಕೆ ತಿಕ್ಕುಜೀಂದ್, ಪಿಂಡ ಬುಡ್ಪುನೆನೇ ಕೈದ್ ಮಲ್ತೆಗೆ
19. ಕುದ್ಕೆ ಕೋರಿ ಸಾಂಕುವೇಂದು ಪಂತ್‍ಂಡ್‍ಗೆ
20. ಕುತ್ತಿಬೀಡಿ ನಟ್ಟುನಾಯಡ ಚುಟ್ಟ ಉಂಡಾಂದ್ ಕೇಂಡೆರ್‍ಗೆ

21. ಕೆಬಿ ಪುಡದಿನಾಯಗ್ ಬೆಡಿ ಪುಡಾಂಡಲ ಕೇನಂದ್‍ಗೆ
22. ಕಲ್ವಡ ಇಲ್ಲ್ ಕಾಪೆರೆ ಪಂಡಿಲೆಕ್ಕ
23. ಕಂಡ ದಪ್ಪರೆ ಅವಂದಿನ ಎರು, ಪಗರಿ ಬುಡಿಯೆರಾವಂದಿನ ಬಿರು
24. ಕಪ್ಪಲ್ ಕಡಲ್‍ಡ್ ಪೋವಂದೆ, ಕೆದುಟು ಪೋವಾ?
25. ಕೋರಿ ಸೈತಿ ಬೊಕ್ಕ ಕಾರ್‍ಗ್ ದಾಯೆ ಬಾಳ್?
26. ಕಿಸೆಟ್ ಕಾಸ್‍ದಾಂತಿನಪಗನೆ ಬಾಯಿದ ಪಸೆ ಆಜೋಡಾ?
27. ಕಜ್ಜಿದ ಮಿತ್ತ್ ಪಚ್ಚೆರಂಗಿ ಪೂಜಿಲೆಕ್ಕಾಂಡ್
28. ಕಂಡಣಿ ಬುಡೆದಿ ಮುಟ್ಟ ಇತ್ತ್‍ಂಡ ಎಡ್ಡೆ, ಸಂಬಂಧದಕುಲು ದೂರ                     ಇತ್ತ್‍ಂಡ ಎಡ್ಡೆ
29. ಕುಂಬರುನ ಸೀಕ್‍ದಾಯೆ ಕುಉರೆಡ್ ಪೋಯಿಲೆಕ್ಕಾಂಡ್
30. ಕಟ್ಟೆದಾಂತಿ ಗುವೆಲ್, ಕಂಡಾಣಿ ದಾಣತಿ ಬುಡೆದಿ.
31. ಕೋಡಂಗಿ ಕಡೆಕ್ ಕಲ್ಪುವೆ, ಸುರೂಟ್ ಕಿರೀಟ ಕಟ್ಟ್‍ಲೆ ಪಂಡೆಗೆ
32. ಕಜೆ ಅರಿತ ಗಂಜಿ ಜೀವೊಗೆಡ್ಡೆ, ಪಜೆಟ್ ಜೆತ್ತ್‍ಂಡ ನಿದ್ರೆಗೆಡ್ಡೆ
33. ಕಂಡಣಿ ಬುಡೆದಿನ ರಾಜಿ ಪಂಚಾಯಿತಿಗೆಗ್ ಬುಡೆದಿ ಬುಡ್ಯಾಯನ್ ಲೆತ್ತೆರ್‍ಗೆ
34. ಕಜಿಪುಗು ಆಪುಜಿ, ಕಟ್ಟೊಗು ಪೋಪುಜಿ, ಕೋರಿ ಮಾತ್ರ ಸಜ್ಜಿ ಉಂಡು                   ಪಂಡೆಗೆ
35. ಕೊಡಪಾನ ಅಡ್ಡ ಪಾಡ್‍ಂಡನೇ ಗುವೆಲ್‍ಡ್ ನೀರಗ, ಬಡಪತ್ತ್‍ಡ್ ತಗ್ಗ್               ಬಗ್ಗ್‍ದ್ ಇತ್ತ್‍ಂಡನೇ ಬದ್‍ಕ್
36. ಕಟ್ಟದ ಕೋರಿ ಪೆಟ್ಟ್‍ಗ್ ಪಿದಾಡ್‍ನಗ, ಕಜಿಪುದ ಕೋರಿ ಬುಲ್ತ್‍ಂಡ್‍ಗೆ               (ಕಣನೀರ್ ಪಾಡ್‍ಂಡ್‍ಗೆ)
37. ಕುದ್ಕಡ ಕೋರಿದ ಕಿನ್ನಿ ಎಡ್ರೆಸ್ ಕೇಂಡ್‍ಗೆ
38. ಕಾಡ್‍ದ ಪಿಲಿಕ್ ಪೋಡಂದಿನಾಯೆ, ತಾಡಂದಿನ ಪೆತ್ತಗ್ ಪೋಡೆನಾ?
38. ಕಂಡ್‍ದ್ ಕಂತಿನ ಕುಕ್ಕು ಕುರಿದ್‍ಂಡ್‍ಂದ್ ಬೇಜಾರ್ ಮಲ್ತೊಂಡಿಲೆಕ್ಕಾ
39. ಕಂಬುಳದ ಕರೆಕ್ ಜತ್ತ್‍ದ್ ಕೆಸರ್ ಆಯೆರೆ ಬಲ್ಲಿ ಪಂಡ ಎಂಚ
40. ಕಂಡನಿನ್ ಕೆರ್ದ್ ಮುಂಡೊದ ಕುಂಕುಮ ಪೋಡೇಂದ್ ಬುಲ್ತಲ್‍ಗೆ

41. ಕನೊಟು ಮೊಬೈಲ್ ತಿಕ್ಕ್‍ಂಡ್‍ಂದ್ ಕರೆನ್ಸಿ ಕಂತ್‍ದ್ ದೀಯೆಗೆ
42. ಕಿದೆನಿಲಿಕೆ ಪೆತ್ತ ಉಂಡು, ಚೊಂಬು ನಿಲಿಕೆ ಪೆರ್ ತಿಕ್ಕುಜಿ
43. ಕುದಿಪ ನೀರ್‍ಗ್ ಕೋರಿ ಮುರ್ಕಾದ್ ತೂಯಿ ದೆತ್ತಿಲೆಕ್ಕ
44. ಕಬಾಟ್ ನಿಲಿಕೆ ಕಾಸ್ ಇತ್ತಿನಾಯಗ್, ಕನೊಟುಲಾ ಕಲ್ವೇನೇ ತೋಜುನಿಗೆ
45. ಕುಲ್ಲಾವುನಕ್ಲೆನ ಎದುರೇ ಕುಂಟೊಂದು ಪೋಯಿಲೆಕ್ಕಾಂಡ್
46. ಕುದ್ಕ ಜಾತಿಡ್ ನಿಯತ್ತ್ ಉಪ್ಪಂದ್, ನಾಯಿ ಜಾತಿಡ್ ಇಕ್ಕತ್ ಉಪ್ಪಂದ್
47. ಕೋಮನ ಕಟ್ಟರೆ ಗತಿದಾಂತಿನಾಯೆ ರಾವಣಲೆಕ್ಕ ಮೀಸೆ ಪೂಜರೆ ಬಲ್ಲಿ
48. ಕಪ್ಪೆ ಗುವೆಲ್‍ಗ್ ಲಾಗಿಂಡ್‍ಂದ್ ಬೇಜಾರ್‍ಡ್ ಮರಿ ವಿಷ ದೆತೊಂಡುಗೆ
49. ಕೋಸ್ ಕಣ್ಣ್‍ದಾಲಾಂಡಲಾ ಮಲ್ಲೆತ್ತ್, ಎಡ್ಡೆ ಕಾಸ್‍ದ ಪೊಣ್ಣಾವೊಡೂಂದು           ಪಂಡೆಗೆ

50. ಕಮ್ಮಿ ಕಲ್ತಿನಾಯನ ತರೆಟ್ ಕೊಮ್ಮೆ ಎಚ್ಚ
51. ಕೂಲಿಗ್ ಬೇಲಿ ಪಾಡ್ದ್ ಏತ್ ತೆಲ್ತ್‍ಂಡ ದಾನೆ?
52. ಕಂಟೆಲ್ ಮುಟ್ಟ ವಿಸ್ಕಿ ಪರ್ದ್, ಕಣ್ಣ್ ದಾನೆ ಮಸಕುಂಡೂಂದು ಕೇಂಡೆಗೆ
53. ಕೊಡಪಾನಲ ಬಲ್ಲ್‍ಲ ತಿಕ್ಕ್‍ನಗ ಗುವೆಲ್‍ಡ್ ನೀರ್ ಆಜಿಂಡ್‍ಗೆ
54. ಕಾಲ ಬನ್ನಗ ಬೀಲೊಗುಲ ಬಿಲೆ ಬರು.
55. ಕಾಸ್ ಇತ್ತ್‍ಂಡ ವಾ ದೇಸೋಗುಲಾ ಪರಿಹಾರ ತಿಕ್ಕು
56. ಕೋಟ ಕಾಸ್ ಇತ್ತ್‍ಂಡ ದಾನೆ? ಕಾಟೊಗು ಪೋಪಿನ ಪೋವೊಡೆ.
57. ಕೂಲಿದಾಂತಿನ ಪರಬಗ್ ಕರ್‍ಂಬುದ ಕೋಲ್ ಕೊರಿಲೆಕ್ಕಾಂಡ್ 
58. ಕಕ್ಕೆ ದೇರರೆ ಕೋಲು ಕೊದಂಟಿ ದಾಯೆ?
59. ಕಣ್ಣ್‍ಗ್ ಕಜವು ಬೂರ್‍ಂಡ್ ಪಂಡಿನೆಕ್ಕ್ ಅಡ್ತ್‍ಂಡ ಪೋವಾಂದ್ ಕೇಂಡೆಗೆ
60. ಕಂಡನಿ ದಾಂತಿನ ಪೊಣ್ಣು ಬಾಕಿಲ್ ದಾಂತಿನ ದಾರಂದ
61. ಕುಬೇರಡನೇ ಕಾಸ್ ಬೋಡಾಂದ್ ಕೇಂಡಿಲೆಕ್ಕ
62. ಕಾರ್ಪೋರೇಶನ್‍ದಕ್ಲೆಗ್ ರೋಡ್ ಗರ್ಪರೆ ಪಂಡ್‍ಕೊರೊಡಾ?
63. ಕೈಟಾ ಕಾರ್‍ಡಾ ಗೋರುನಾಯೆ ಪೋನಗ ಮೈಟಿಡೇ ನಲಯಿದಾಯೆ ಬತ್ತೆಗೆ
64. ಕೆತ್ತಿಡೇ ಕೆಲೆಪುನಾಯನ ಪಿದಯಿ ಬತ್ತಿ ಬೊಕ್ಕ ದಂಬಿಜ್ಜಿ.
65. ಕಾರ್‍ಗ್ ಪಿಜಿನ್ ಪರತ್‍ಂಡ್‍ಂದ್ ಕಡ್ತ್ ದಕ್ಕರೆ ಆಪುಂಡಾ?
66. ಕಣನೀರ್ ನಿಂಗ್‍ಂಡ ಬೇಜಾರ್ ಪೋವಂದೆ ಉಬಿನೀರ್ ನಿಂಗ್‍ಂಡ ಬಾಜೆಲ್         ಕರಿಪಂದ್
67. ಕಂಡನಿ ಬುಡೆದಿಗ್ ಆತೆಕ್ಕಾತೆ. ಇಲ್ಲ್ ನಿಲಿಕೆ ಜೋಕುಲೇ ಜೋಕುಲು
68. ಕುಟ್ಟಿ ದೊನ್ನೆ ಗೊಬ್ಬರೆ ಕೊತ್ತಲಿಂಗೆ ಕಂತೆಗೆ
69. ಕಾರ್ ಕಡಿದಿನಾಯೆನೆ ಧೈರ್ಯೊಡುಪ್ಪುನಗ, ಮುಟ್ಟುದ ಬಾರ ಕಡಿದಿನಾಯನ         ಎಂಚಿನ ಕುಸುಕುಸು
70. ಕಾರ್‍ಗ್ ಪೈಂಟ್ ಆವೊಡೂಂದು ಕಾರ್‍ಪೆಂಟರ್‍ಡ ಪಂಡ ಆವಾ?
71. ಕಾಸ್ ಆಂಡ್ ಪಂಡ್‍ದ್ ಗೋಡೆ ಗಡಿಯಾರನ್ ಕೆಕ್ಕಿಲ್‍ಗ್ ನೇಲಾವೊಂದು             ಪೋತೆಗೆ.

72. ಕೃಷ್ಣನ ವೇಸ ಪಡುನಾಯಗ್ ಪುರಲ್ ಪತ್ತರೆ ಗೊತ್ತಿತ್ತ್‍ಂಡ ಯಾವುಜಾ?
73. ಕಾವಲಿ ಕಾಯಂದೆ ದೋಸೆ ಮಯ್ತ್‍ಂಡ ಎಂಚ?
74. ಕಾರ್ ಪೊಲಿದಿನ ಎರುನು ನಂಬೊಂದು ಕಂಡ ದಪ್ಪರೆ ಪಿದಾಡಿಲೆಕ್ಕಾಂಡ್
75. ಕಾಯಿನ್ ಬಾಕ್ಸ್‍ಗ್ ಕಾಸ್ ಪಾಂಡ್‍ದ್ ಪಾತೆರೊಲಿ ಕಾನಿಗೆ ಡಬ್ಬಿಗ್ ಕಾಸ್           ಪಾಡ್‍ಂಡ ಪಾತೆರ್ರೆಬಲ್ಲಿ
76. ಕಾಸ್ ಎಚ್ಚ ಇತ್ತಿನಾಯೆ ಕುರೆಪಟ್ಟ್, ಎಚ್ಚ ಕಲ್ತಿನಾಯೆ ಚೊರೆಪಟ್.
77. ಕಸಂಟ್ ಬುದ್ದಿದಾಯನ ಮುಸುಂಟು ತೂನಗನೆ ತೆರಿಯ
78. ಕೇರ್‍ಲೆಸ್ ಮಲ್ತ್‍ಂಡ ಕೇರೆ ತುಚ್ಚಿಂಡಲ ಡೇಂಜರ್‍ಗೆ
79. ಕೊಂಟು ಬೆಡಿ ಪತೊಂದು ಬೊಂಟೆ ದೇರೆರೆ ಪೋಯಿಲೆಕ್ಕಾಂಡ್
80. ಕೈಟ್ ಕಾಸಿಜ್ಜಾಂಡಲ ಫೇಸ್‍ಬುಕ್ಕ್‍ಡ್ ಐಸಿರದ ಫೋಟೋ ಪಾಡಿಯೆಗೆ.
81. ಕಟ್ಟಗ್ ಪೋಯಿನ ಕೋರಿ ಚಟ್ಟಗ್ ಪೋಯಿನ ನರಮಾನಿ
82. ಕೇಸ್‍ಲ ಪೋಡು ವಕೀಲೆರೆಗ್ ಕೊರ್ನ ಫೀಸ್‍ಲ ಪೋಂಡು ಪಂಡಿಲೆಕ್ಕ
83. ಕೆರ್ದ್ ಬಲ ಪಂಡಿನೆಕ್ಕ್ ನೆರ್ದ್ ಬತ್ತೆಗೆ
84. ಕೋಮಣ ಕಟ್ಟರೆ ಗತಿ ಇಜ್ಜಾಂದಿನಾಯೆ ಇಲ್ಲ್ ಕಟ್ಟರೆ ಪಿದಾಡಿಲೆಕ್ಕಾಂಡ್
85. ಕೋರಿ ಒಕ್ಕ್‍ಂಡ ಏತ್ ಗುಂಡಿ ಆವು?
86. ಕೋರಿ ಒಕ್ಕ್‍ದ್ ನೀರ್ ತಿಕ್ಕಿನ ಉಂಡಾ?
87. ಕುದ್ಕಡ ಕೇಂಡ್‍ದ್ ಬದ್ಕೆರೆ ಕಲ್ತಿಲೆಕ್ಕ
88. ಕೇಬಲ್‍ದಾಯಡ ಕಷ್ಟ ಪಂಡೊಂಡಿನೆಕ್ ನಾಲ್ ಚಾನೆಲ್ ಎಚ್ಚ ಕೊರಿಯೆಗೆ
89. ಕಜ್ಜಿದಾಯಗ್ ಕಿರ್‍ಂಬರೆ ಇಜ್ಜಿ ಪಂಡೆರ್‍ಗೆ

90. ಕಡಲ್‍ದ ಪೊಯ್ಯೆಗ್ ಒಂಜಿ ಪುಡಯಿಡ್ ದಿಂಜಾಯರೆ ತೀರುವಾ?
91. ಕಾರ್ಡ್ ದಾಂತೆ ಏಟಿಎಮ್‍ಗ್ ಪೋಪಿನಲ ಒಂಜೆ, ಕಂಜಿ ಬುಡಂದೆ ಪೇರ್               ಬೊರಿಪುನಲ ಒಂಜೆ
92. ಕೇಸ್ ಮುಗಿ ಬೊಕ್ಕ ಕೋರ್ಟ್ ಬಲ್ಲಿ, ಸೋಕ್ ಮುಗಿ ಬೊಕ್ಕ ಮರ್ದ್ ಬಲ್ಲಿ,
93. ಕುದುರೆಡ್ ಪೋನಗ ಪಂದ್‍ದಿಜೆ, ಮೇನೆಡ್ ಪೋನಗ ಮಗ್‍ರಿಯೆ
94. ಕಂಡನಿಲ ಸೈಯೊಡು ಕರಿಯಣಿಲ ಒರಿಯೊಡು ಪಂಡ ಎಂಚ
95. ಕೊರ್ಪಿನ ಮನಸಿತ್ತಿನಾಯೆ ಕೊರೊಡಾ ಕೊರೊಡಾ ಪಂಡ್‍ದ್ ಕೇನುಜೆ
96. ಕರೆನ್ಸಿ ಇಜ್ಜಂದಿನಾಯನ ಮೊಬೈಲ್‍ಗ್ ಮಿಸ್‍ಕಾಲ್ ಕೊರಿಲೆಕ್ಕ
97. ಕೊಪ್ಪರ್ ಆದ್ ಬಪ್ಪರ್ ಪಾತೆರಿಲೆಕ್ಕ
98. ಕಂಡಶನ್ ಅಪ್ಲೈಡ್ ಬರೆದ್ ಕಂಡಾಬಟ್ಟೆ ರಿಡಕ್ಷನ್ ಉಂಡೂಂದು ಲೆತ್ತಿಲೆಕ್ಕ
99. ಕಾರ್ಣಿಕದ ದೈವಗ್ ಕಾಣಿಕೆ ಎಚ್ಚ
100. ಕಾಣಿಕೆ ಎಚ್ಚ ಬೂರುನೆಕ್ಕ್ ಕಾರ್ನಿಕದ ದೈವಂದ್ ಪಂಡಿಲೆಕ್ಕಾ
101. ಕಲ್ವನ ಇಲ್ಲಡೆ ಕಂಡ್‍ದ್ ಪೋಂಡು ಪಂದ್ ಕಂಪ್ಲೇಂಟ್ ಕೊರಿಲೆಕ್ಕ
102. ಕುಸಿ ಕೊರಂದಿ ಕಲೆ, ಅಸರ್ ಗಾವಂದಿ ಅಲೆ
103. ಕಮ್ಮಿಗ್ ತಿಕ್ಕ್‍ಂಡ ಪಂದ್ ಕಮ್ಮಿದ ಬ್ಯಾಡ್ರಿ ದೆತೊಂಡೆಗೆ
104. ಕ್ಲಾಲ್‍ಕುಲೇಶನ್/ ಕೂಡ್ಯಾವುನ ಕಲೆವುನ ಗೊತ್ತಿಜ್ಜಂದೊನಾಯನ್ ಕ್ಯಾಶ್             ಕೌಂಟರ್‍ಡ್ ಕುಲ್ಲಾಯಿಲೆಕ್ಕ
105. ಕೊರುಂಗುದ ಲಕ್ಕ ಇಪ್ಪುನ ಆನಗ್ ಕೊಂಗರೆ ಕೂಲಿದ ಪೊಣ್ಣು
106. ಕೋಡಿ ಎತ್ತಿ ಬೊಕ್ಕ ಗಾಡಿದಾಯನ್ ದಾಯೆ ಕಾಪಾವೊಡು?
107. ಕಾಕಿ ಪಾಡುನಕುಲು ಮಾತ ಪೋಲಿಸ್‍ದಕುಲತ್ತ್